Yr Adran Anghenion Dysgu Ychwanegol

Croeso a Gweledigaeth

Croeso cynnes iawn i’r Gorwel lle mae ein gweledigaeth yw darparu’r gefnogaeth orau ar gyfer disgyblion ag ADY.  Dymunwn fod y disgyblion yn ddi-wahan yn dysgu i ymdopi ag amrywiaethau cymdeithasol.  Ymhyfrydwn yn ein darpariaeth gynhwysol.

Mae’r Gorwel yn enw gwych ar gyfer ein canolfan Anghenion Dysgu Ychwanegol oherwydd y golygfeydd trawiadol sydd i’w gweld o’n ganolfan braf a’i ffenestri enfawr. Ond hoffem fel staff y Gorwel feddwl bod ystyr ehangach i’r enw – yn aml iawn, anelwn am y Gorwel a dyna’n nod ni yma yn y Gorwel – sicrhau fod gan y dysgwyr sydd o fewn ein gofal y gefnogaeth a’r medrau i wireddu eu potensial yn llawn tra yn ddisgyblion ym Mro Dur a thu hwnt.

Staff

 

Mrs Gwenllian Dooher yw Cydlynydd Anghenion Dysgu Ychwanegol (CADY) yr ysgol ac y mae ei gwaith yn cynnwys sicrhau bod anghenion dysgu ychwanegol disgyblion yn cael eu hadnabod, bod y ddarpariaeth ddysgu ychwanegol fwyaf perthnasol yn ei lle ar gyfer disgyblion a chydlynu holl waith yr adran.

 

 

Miss Rhiannon Rees-Givelin yw Uwch-gynorthwyydd Dysgu yr ysgol. Y mae ei rôl yn cynnwys cydlynu gwaith ymyrraeth cau’r bwlch ôl-covid yn yr adran, cydlynu a rhedeg ein rhaglenni ymyrraeth amrywiol a chefnogi disgyblion 1:1 yn Y Gorwel.

 

Y mae’r tîm hefyd yn cynnwys ein cynorthwywyr cynnal dysgu brwdfrydig Miss Cerys Thompson, Miss Chelsea Thompson, Miss Cerys Morgan a Miss Lucy Edwards.

 

Rhaglenni Ymyrraeth

Cynhelir holl raglenni ymyrraeth yr Adran ADY yn y Gorwel, a’n bwriad ar bob achlysur yw cadw’r niferoedd sydd yn eu mynychu’n fychan er mwyn sicrhau sylw arbenigol i bob unigolyn. Caiff disgyblion eu gosod mewn grwpiau â disgyblion eraill ag anghenion dysgu ychwanegol a sgiliau tebyg.

Y mae’r adran yn darparu ystod o raglenni ymyrraeth er mwyn cefnogi disgyblion a’u cynorthwyo wrth wneud cynnydd academaidd gan gynnwys gweithdai darllen a sillafu yn y Gymraeg a’r Saesneg a gweithdai rhifedd. Er mwyn cefnogi disgyblion ag anghenion dysgu ychwanegol cymdeithasol ac emosiynol, yr ydym hefyd yn darparu gweithdai megis clwb Lego, Grŵp Talkabout ac ELSA.

Cewch wybodaeth benodol o ran y rhaglen ymyrraeth fwyaf perthnasol i’ch plentyn yn ystod y broses o osod y Cynllun Addysgu Unigol (CAU) neu’r Cynllun Datblygu Unigol (CDU) yn eu lle. 

 

Clwb y Gorwel

Rydyn ni’n deall fod amseroedd cinio yn gallu bod yn anodd i nifer o’n dysgwyr – ac oherwydd hynny y sefydlwyd Clwb y Gorwel. Bwriad y clwb yma yw i gynnig hafan i ddisgyblion sydd yn gweld yr ochr gymdeithasol o amser cinio yn anodd, i gynnig cefnogaeth academaidd pellach i’r rheiny sydd ei angen ac i fod yn gyfnod o hwyl i’r rheiny sydd yn dymuno cystadlu gydag athrawon y Gorwel dros gêm fwrdd!
 

Cefnogaeth tu hwnt i oriau’r ysgol

Deallwn ei bod hi’n anodd iawn i rai o’n disgyblion ag anghenion dysgu ychwanegol i gwblhau eu gwaith cartref a bod y broses yn gallu bod yn rhwystredig iawn iddynt. Er mwyn cynorthwyo disgyblion felly, y mae gan bob disgybl sy’n cael ei gefnogi gan yr adran fynediad i’n Teams adrannol.

Y mae croeso cynnes iawn i ddisgyblion ddefnyddio’r Teams hwn i gysylltu â ni ac i dderbyncymorth a chyfarwyddiadau pellach gyda’i gwaith. Fe fydd y cynorthwyydd cynnal dysgu sydd yn cefnogi’ch plentyn yn rhannu enw’r Teams perthnasol gyda’ch plentyn yn ystod y sesiwn rhaglen ymyrraeth gychwynnol ac yn sicrhau ei fod yn ymwybodol o sut i gael mynediad iddo o adref. Y mae croeso cynnes i chithau hefyd ddefnyddio’r Teams i holi cwestiwn os oes angen cymorth neu arweiniad pellach arnoch.

 

Cysylltiadau allanol

Fel adran yr ydym yn gweithio’n agos iawn â nifer o asiantaethau allanol gan gynnwys y Seicolegydd Addysg, athrawon ymgynghorol ASD, anawsterau dysgu penodol, Nam Clyw a Nam Gweledol y Sir, therapyddion Iaith a Lleferydd a thîm Cynnal Ymddygiad y Sir. Pe bai angen cymorth arbenigol ar eich plentyn, fe fyddai’n bosibl i ni gyfeirio at yr arbenigwyr hyn er mwyn derbyn cefnogaeth ychwanegol.

Cliciwch ar y ddolen 'JIGSAW' isod er mwyn cysylltu â'r gwasanaeth Cwnsela ysgolion.

Sut i gysylltu â ni

Os oes gennych unrhyw gwestiynau neu hoffech drafod darpariaeth a chefnogaeth eich plentyn, y mae croeso cynnes iawn i chi gysylltu â’r adran drwy’r manylion isod.

Rhif ffôn yr ysgol: 01639 502895

Mrs Gwenllian Dooher: DooherG@hwbcymru.net